Административдик орган тарабынан чыгарылган акт административдик акт болуп саналабы? Анын үстүнөн даттанса болобу? Алгач ушуну аныктап алышыңыз керек.
Сиз административдик орган тарабынан белгилүү бир убакыт аралыгында анык бир иш-аракеттер аткарылбасын деген сунушту камтыган кат алдыңыз дейли. Мисалы, курулуштагы ызы-чуу иштерди чектөө боюнча. Бул кат административдик акт болуп саналбайт, анткени ал актынын үч милдеттүү талабынын эч бирине жооп бербейт. Тактап айтканда, мындай кат сунуш мүнөзүнө ээ жана укуктук кесепеттерди жаратпайт, башкача айтканда, арыз берүүчү жана/же кызыкдар тарап үчүн укуктарды жана милдеттерди белгилебейт, өзгөртпөйт жана токтотпойт. Адам аны аткарууга милдеттүү эмес.
Кайсы нормативдик акт административдик органдын актылары, аракеттери (аракетсиздиги) боюнча даттануу тартибин жөнгө саларын билиңиз. Мисалы, сот аткаруучусунун актылары административдик процедуралар тууралуу мыйзам менен эмес, КРдин «Сот аткаруучулардын статусу жана аткаруу өндүрүшү жөнүндө» мыйзамы менен жөнгө салынат.
Акты боюнча даттануу мөөнөтү өтүп кетпедиби? Текшериңиз. Мисалы, эгерде сизге административдик акт 1-сентябрда тапшырылса, анда бул күндөн тартып 30 жумушчу күндүн ичинде даттануу берүү үчүн убакыт бар.
Административдик иштин материалдары менен таанышып, көчүрмөлөрүн алып алыңыз. Административдик орган сизге документтерди берүүгө милдеттүү.
Эгерде даттануу мөөнөтү аяктап баратса, иш каралганга чейин материалдарды берүү талабын коюңуз жана материалдарды карап чыккан соң даттанууну толуктай аларыңызды айтыңыз.
Административдик акт форма жана мазмун боюнча мыйзам талаптарына жооп беришин текшериңиз. Мисалы, эгерде акт кабыл алынган күндү, каттоо номерин же кызмат адамынын атын камтыбаса, анда ал жараксыз болуп, административдик орган тарабынан жокко чыгарылышы керек.
Акт ыйгарым укуктуу административдик орган тарабынан кабыл алынганын жана талаштуу болуп жаткан актыларды кароого жана кабыл алууга укугу бар экенин текшериңиз.
Даттанууну форма жана мазмун боюнча бардык талаптарды эске алуу менен түзүңүз. Эгерде сиздин атыңыздан ишенимдүү адам аракеттенип жатса, ишеним кат нотариалдык жактан күбөлөндүрүлгөн болуп, анда ишенимдүү адам сиздин атыңыздан кол коюуга укуктуу экени сөзсүз көрсөтүлүшү керек.
Даттанууну административдик органга түздөн-түз тапшырып, өзүңүздө калчу нускасына датасы жана кирүү номери менен мөөрдү койдуруп алыңыз.
Эгерде даттанууну кароонун күнү жана убактысы дайындалып, бирок иштин материалдары сизге бериле элек болсо, даттанууну кароону кийинки жыйынга которуу жана иштин материалдарын берүү боюнча өтүнмө бериңиз.