Баланы биринчи класска кабыл алуу электрондук система аркылуу жүргүзүлөт. Электрондук каттоо Кыргызстандын бардык аймактары үчүн жеткиликтүү жана акысыз.
Жеңилдетилген категориялар
Система төмөндөгүлөргө артыкчылык берет:
- Аскер кызматчыларынын балдары.
- Кайрылман статусу бар этникалык кыргыздардын балдары.
- Бир жылдан кем эмес иштеген мугалимдердин жана мектеп кызматкерлеринин балдары.
Катталуу үчүн минималдуу жаш курак
- Бала системага катталуу үчүн окуу жылынын башталышына карата 6 жашка толушу керек.
Каттоо эрежелери
- Учурдагы окуу жылы үчүн гана каттоо жүргүзүлөт. Балаңызды алдын ала каттай албайсыз.
- https://mektep.edu.gov.kg/organization-check шилтемеси аркылуу ата-энесинин жеке номурун (ПИН) киргизип, кайсы мектепке таандык экениңизди текшере аласыз.
- Система атайын мектептерге, музыкалык мектептерге же интернаттарга жазылууну жүргүзбөйт.
Сиз баланы https://mektep.edu.gov.kg/ шилтемеси аркылуу төмөндөгү убакыт чектеринде каттай аласыз:
- 10-апрелден 26-майга чейин – эгер каттоо юридикалык жашоо дарегиңиз аркылуу болсо.
- 26-июндан 31-августка чейин – эгер каттоо азыркы (чыныгы) жашоо дареги боюнча болсо.
Мобилдик телефон же компьютер аркылуу интернетке кирүү зарыл.
Арыз берүү үчүн төмөнкүлөр керек:
- Ата-энесинин/мыйзамдуу өкүлүнүн паспорттору.
- Ата-эненин/мыйзамдуу өкүлүнүн жана баланын жеке идентификациялык номери (ПИН).
- Баланын туулгандыгы тууралуу күбөлүгү.
- Уюлдук телефон номери.
- Электрондук почта (логин жана сыр сөз жиберишет).
- Кошумча электрондук почта (каттоо жазуусун алыбына келтирүү үчүн кызмат кылат).
Эгерде балада ПИН жок болсо, калкты тейлөө борборуна кайрылыңыз. Мамлекеттик каттоо кызматынын порталынан каттоо дарегинин бар-жогун текшериңиз.
Ачыңыз: https://mektep.edu.gov.kg
Арыз берүү үчүн төмөнкү маалыматтарды ырааттуу толтуруңуз:
- Балага ким болуруңузду көрсөтүңүз?
- Атасы;
- Энеси;
- Мыйзамдуу өкүлү (бул пунктту тандасаңыз, тиешелүү документти PDF форматында тиркешиңиз керек).
- Баланын ата-энеси/мыйзамдуу өкүлү жөнүндө маалымат:
- Жарандыгы;
- Жеке идентификациялык номери (ПИН), аты-жөнү, паспорттук маалыматтары (сериясы, номери);
- Мобилдик номер;
- Негизги электрондук почта (логин жана сыр сөз ошол жакка жиберилет);
- Кошумча электрондук почта;
- Жеңилдик каралган болсо, тиешелүү пунктту тандаңыз жана документти PDF форматында тиркеңиз.
- Бала жөнүндө маалымат:
- Жеке идентификациялык номери (ПИН), аты-жөнү, туулган күнү-жылы, баланын жынысы;
- Туулгандыгы тууралуу күбөлүктүн сериясы, номери;
- Мектепти тандоо:
Биринчи этапта:
- Каалаган окуу тили;
- Ата-энелердин катталган дареги боюнча системада автоматтык түрдө тиешелүү мектеп көрсөтүлөт.
Экинчи этапта:
- Каалаган окуу тили;
- Бош орундар бар болсо, арыз ээси каалаган мектепти тандай алат.
- Арызды жиберүүдөн мурда бир көз жүгүртүп, баарын текшерип чыгыңыз. Арызыңыз катталгандан кийин электрондук почтаңызга билдирүү келет.
Балаңыз 1-класска кабыл алынганы тууралуу билдирүү аласыз. 1-августтан 31-августка чейин мектепке төмөнкү документтерди тапшырышыңыз керек:
- Баланын күбөлүгүнүн жана ата-энесинин/мыйзамдуу өкүлдөрүнүн биринин паспортунун көчүрмөлөрү;
- Баланын ден соолугу тууралуу маалымкат;
- Эмдөөлөр таржымалы тууралуу документтин түп нускасы (форма 063);
- Баланын 3х4 см өлчөмүндөгү сүрөтү.
Баланы мектепке киргизүү, электрондук система тууралуу суроолоруңуз калса, 110 кыска номуруна чалыңыз. Кыска номур дүйшөмбү-жума күндөрү саат 9:00дөн 18:00гө чейин иштейт.