Ажырашып жатканда ата же эне ата-энелик укугунан баш тартуу тууралуу арызды жазып, бул арызды нотариус тарабынан күбөлөндүрсө болот. Бирок андан кийин баары бир сотко кайрылыш керек.
Ата-энелик укугунан өз ыктыяры менен баш тартуу тууралуу арыздын өзү жетиштүү эмес. Сот ата-энелик укуктан ажыратуу чечимин жетиштүү негиздер болгон учурда гана чыгарат.
Баса, ата-энелик укуктан баш тартуу арызында “сотко катышпайм, менсиз маселени чече бергиле” деп жазылган күндө да ал ата (апа) баары бир сотко чакыруу алат.
Эң маанилүүсү: ата-энелик укуктарынан ажыроо ата-энени алимент төлөөдөн бошотпой тургандыгын эстен чыгарбаш керек. Ата-энелик укуктарынан ажыратылган ата-эне бала 18 жашка чыкканга чейин алимент төлөөгө милдеттүү.